Koding kan bli valfag

Det er så langt uvisst om nokre av ungdomsskulane i Os og Fusa vil søkja seg med i regjeringa sitt prøveprosjekt med koding som valfag i ungdomsskulen.

Frå hausten 2016 kan 30 skular i landet få koding som valfag.

Koding som valfag blir innført som eit prøveprosjekt, der over 30 kommunar kan bli med.

Søknadsfristen for skular som ønskjer å delta i prosjektet er om tre vekers tid, tysdag 1. mars.

- Dette er heilt nytt, og vi har ikkje fått diskutert saka her enno, så eg veit ikkje om vi kjem til å søka fortel rektor ved Os ungdomsskule, Kåre Lutro.

Skulen har tidlegare prøvd ut konseptet med såkalla "Kodetime", men rektor veit likevel ikkje om dei vil gå inn for å prioritera det nye valfaget.

- Vi skal vurdera det, seier han.

Det same kan rektor ved Nore Neset ungdomsskule, Anne Fristad fortelja.

- Vi skal snart sjå på planen for neste år, då vil vi også vurdera dette nye valfaget, seier ho.

Ho opplyser at dei også er avhengige av å alt ha ressursar blant eigne lærarar som kan undervisa i faget, for å eventuelt kunna starta opp med det.

Les også:Med Minecraft på timeplanen

Regjeringa har tru på at dette er eit fag som blir viktig for framtida.

- Eit viktig mål med å innføra koding som valfag er å auka elevane si interesse for teknologi og realfag. Gjennom koding får elevane erfara at realfaga er kreative og spennande, og ikkje minst er desse kompetansane viktige i framtida, uttaler kunnskapsminister Torbjørn Røe Isaksen i ei pressemelding.

Programmering som valfag blir innført som eit pilotprosjekt og skal gå over tre skoleår.

- Elevane får læra korleis datamaskinar og program verkar og dei får opplæring i ulike programmeringsspråk og deira bruksområde. Eksempel på oppgåver kan vera å programmera eigenutvikla robotar og å lage enkle dataprogram eller animasjon, forklarer kunnskapministeren.

Det er også meininga å gje lærarar som ønskjer å auka dei teknologiske kunnskapane sine moglegheit til å læra meir om programmering og koding.