Dale på pallen i Strandvik

Junior Sofia Dale er ein av osingane som gjorde det skarpt på feltstemne i Strandvik i helga.

Fleire skyttarar frå Os og Strandvik skyttarlag skaut godt i felt då Strandvik Skyttarlag i helga arrangerte dobbeltstemne saman med Tysse skyttarlag.

Sofia Dale frå Os Skyttarlag tok andreplass i klasse rekrutt i finfelt i Strandvik-felten og nok ein andreplass i Tysse sin fin felt 30-skudd. Ho vann dermed klasse Rekrutt samanlagt med lågaste plassiffer.

- Sponsorane våre gav totalt 6.500 kroner som vart delt på dei som hadde beste plassering samanlagt frå dei to stemna, og ho vann den samanlagt på finfelt, forklarer leiar i Strandvik skyttarlag, Erik Vik.

Fleire lokale pallplasseringar

Dale sin klubbvenninne Amalie Evensen stakk av med tredjeplass i juniorklassen i same Strandvik sin finfelt. Trygve Haugen frå Sævareidfjorden tok også ein tredjeplass i V65.

I Strandvik sin grovfelt stakk Ove Vaktdal frå Os skyttarlag av med tredjeplass i mesterskapklasse ein, medan Arvid Austefjord, også frå Os, slo til med førsteplassen i sin klasse, meisterskap V55.

På Tyssefelten sørga juniorskyttar Jens Georg Gulbrandsen for at arrangør Strandvik skyttarlag også fekk ein pallplassering denne helga, med ein andreplass i fin felt 30-skudd.

Anita Bjørkedal frå Sartor skyttarklubb, som vart dobbelt Noregsmeister i fjor, vann junior-klassen i begge stemna.

Populært stemne

Begge stemna hadde 153 deltakarar, noko som gjer det til eit stort arrangement, så både laurdagen og søndagen gjekk med for å få avvikla.

- Vi arrangerte på same måten i fjor også, og det har vore populært fordi dei får reisa til ein plass og skyta to stemne, seier Vik.

Dobbeltstemne fungerre slik at to skyttarlag arrangerer to stemne i eitt, på same plass og same dag.

- Alt føregår ute, på tre ulike område i Strandvik. Vi byrja laurdagen og heldt på heile søndagen, fortel Vik.

Mange frivillige

Feltskyting skjer ikkje på fast skytebane, men ein set opp figurar ute i naturen, og skyttarane skyt på ulike figurar og på forskjellige, ukjende avstandar, på mellom 100 til 400 meter.

- Det er mykje logistikk for å få det til å gå i hop, fortel Vik.

Han kan opplysa at dei hadde rundt 50 til 60 frivillige frå Strandvik og Tysse, som stilte på dugnad for å få løyst alle oppgåvene.

- Det krevst mykje førebuing. Figurar skal setjast ut, stiar inn til områda sperrast av, og folk må varslast. I tillegg må vi arrangera busstransport mellom arenaene og sørgja for at deltakarane har ein plass å opphalda seg, forklarer Vik.

Opphaldsområdet vart lagt til varmestova til 15m skytebanen som ligg i Fusa Ridehall.

- Der hadde vi kafé, omkledning og resultatservice, seier Vik.

Største stemne i år

Arrangørlaga skaut på laurdag og alle dei andre på søndagen. Den dagen var det skyting frå klokka 9.00 om morgonen til 18.00 på ettermiddagen.

- Med over 150 deltakarar vart dette det feltstevnet i Hordaland med flest deltakarar i år, fortel Vik.

Stor deltaking byr også på mykje arbeid.

- Det er veldig mykje arbeid og ei ekstra logistikkutfordring å arrangera to lag saman. Men så er det ekstra gøy at så mange kjem når vi har gjort så mykje førebuing, seier Vik.

Takksame

I laget er dei om lag ti til tolv aktive skyttarar, og dermed på langt nær nok folk til å klara alt sjølve.

- Vi har hatt veldig mange frå bygda som var med og arrangerte og hjelpte til med førebuing og arrangement. Det er vi utruleg glade for. I tillegg har vi fleire grunneigarar som lét oss bruka bakkane deira, noko vi set stor pris på. I det heile er vi veldig takksame for alle som er med og gjer dugnad og for alle dei flotte sponsorane våre.

Dei to stemna som vart arrangert i helga er også dei to siste i feltkarusellen i Hordaland skyttersamlag.

I tillegg til dei to opne stemna arrangerte Bjørnefjorden skyttarkrins krinsstevne inni same stevne, samt at arrangørklubben Strandvik hadde lagstemne.

- Resultata tel for fleire stemne, forklarer Vik.